El nuestru himnu entama: "Ye Uviéu ciudá d’abolengu" pero teo pa mi qu’Uviéu tamién ye, y va ser siempres, Vetusta. Dende va munchu (¿dende siempre?) los uvieinos, en xeneral, davezu sentímonos "ciudadanos". Nos, nun somos aldeanos; nos, somos perimportantes: la mui noble, mui lleal, benemérita, invicta y heroica ciudá, márcanos dafechu.
Nestes dómines y con nestos antecendentes tampoco nun ye raro que’l carbayón fuere l’asturianu que menos falaba la llingua de nueso. Va muncho tiempu que yera perdifícil sentir falar n’asturianu n’Uviéu. Avergoñábanos, yera d’aldeanos.
Ye percuriosu que fuera'l llamentable fechu de la baxada del Real Uviéu a tercera un detonante pa camudar esta realidá: pal resurdir de la llingua de nueso n’Uviéu.
El fechu de que los medios de comunicación de la capital refugaren al Real Uviéu y los más d’ellos apostaren pol enxendro, fizo que los uvieistes nun pudiéremos sentir los alcuentros del nuestru equipo en direuto. Tuvo que ser una radio llibre y n’asturianu -Radio Sele- la qu’entamó, malpenes sin más medios qu’un teléfonu móvil, a tresmitir los partíos.
Y asina, los Uvieistes que nun podíamos dir cola riada azul polos barrizales d’Asturies, sentábamos los domingos delantre l’ordenador o la radio pa sentir el 106.5FM... pa sentir la única emisora que radiaba en direuto los partíos del Uviedín. Pero esta emisora falaba -fala- n’asturianu.
Gracies a esto, de poco a poco, los uvieinos fuimos perdiendo'l mieu y la vergoña de falar la llingua de nueso y davezu yera habitual, non el llenu na perrera, si non sentir a carbayones falando n’asturianu.
La baxada del Real Uviéu a los abismos del infiernu de la tercera foi'l resurdir del asturianu na Capital del Principáu.
Milagros de los efeutos collaterales.
